General Sergey Surovikin yagizwe umuyobozi mushya w’ingabo ziri ku rugamba muri Ukraine, mu gihe icyo gihugu gikomeje guhangana no kugumana uduce cyigaruriye,ibi kaba byatangajwe na Minisiteri y’Ingabo y’u Burusiya.
Lieutenant General Igor Konashekov Umuvugizi wa Minisiteri y’Ingabo y’u Burusiya, yemeje aya makuru kuri uyu wa Gatandatu nk’uko byatangajwe n’ibiro ntaramakuru by’u Burusiya, Tass.
General Surovikin si mushya mu buyobozi bukuru bw’Ingabo mu Burusiya, kuko yayoboye Ingabo mu burasirazuba bw’icyo gihugu ndetse yayoboye Ingabo z’u Burusiya zarwanye muri Syria.
Surovikin ashyizwe kuri uyu mwanya nyuma yaho u Burusiya bwahuye n’ikibazo cy’imodoka yaturikiye ku kiraro cya Kerch, nk’inzira rukumbi y’ubutaka ihuza u Burusiya n’agace ka Crimea bwiyometseho guhera mu 2014. Ni ikiraro gihuza umuhanda wa gari ya moshi n’uw’imodoka zisanzwe.
Iyi kamyo yaturikiye kuri iki kiraro mu gitondo cyo kuri uyu wa Gatandatu, iteza inkongi ku makamyo yari apakiye ibikomoka kuri peteroli, igice kimwe cy’ikiraro kiragwa.
Abantu batatu bari mu modoka yagendaga iruhande rw’iyo kamyo yaturikiye ku kiraro nibo baguye muri iyi mpanuka. Imirambo yabo yavaywe hasi mu mazi.Iki kiraro cyahise gisanwa, cyongera gufungurirwa imodoka ntoya n’inini. Ntabwo biramenyekana niba Ukraine yaba ifite uruhare muri ibyo bibazo.
Kanda hano udukurikirane (Follow) kuri Facebook Page yacu, cyangwa ukande hano ukore subscribe kuri Youtube Channel yacu
