Imirwano ‘ikomeye’ hagati y’ingabo za leta ya DR Congo (FARDC) n’inyeshyamba za M23 muri teritwari ya Rutshuru yakomeje kuwa mbere ku munsi wa gatanu aho byemejwe ko agace ka Ntamugenga kafashwe na M23.
Ku cyumweru imirwano yabereye muri centre ya Ntamugenga iri ku ntera iri munsi ya 15 km uvuye ku mujyi wa Rutshuru ari nawo ‘chef-lieu’ y’iyi teritwari.
Kuwa mbere, ibinyamakuru byo muri Congo byasubiyemo umuvigizi w’ingabo Lieutenant Colonel Guillaume Njike Kaiko yemeza ko ako gace kafashwe na M23.
Ikinyamakuru Actualite gisubiramo Njike Kaiko avuga ko FARDC yavuye muri Ntamugenga yirinda ko imirwano n’inyeshyamba “yatuma hapfira abasivile benshi.”
Itangazo rya FARDC ryo ku cyumweru nijoro rivuga ko muri ako gace ka Ntamugenga “imirwano ikomeje” kandi ko “ibintu birimo kugenzurwa n’ingabo za leta ku ngamba zose”.
Ntamugenga ni agace kari kumuhanda mukuru uhuza umujyi wa Rutshuru n’umujyi wa Goma, mu ntara ya Kivu ya ruguru, hafatwa nk’agace k’ingenzi muri uru rugamba
FARDC ivuga ko M23 yateye Ntamugenga kugira ngo ihagarike uburyo bwo kugeza ibikenerwa ku ngabo ziri ku rugamba muri Rutshuru.
Itangazo rya FARDC rivuga kandi ko abasivile bane bapfuye naho abagera kuri 40 “barimo abana” bakomeretse aharimo kubera imirwano hatandukanye muri Rutshuru.
Ishami rya ONU rishinzwe ibikorwa by’ubutabazi, OCHA, rivuga ko abantu bagera ku 23,000 bamaze guhunga iyi mirwano yatangiye kuwa kane, harimo abagera ku 2,500 bahungiye muri Uganda.
FARDC na M23, buri ruhande rushinja urundi kuba ari rwo rwatangije iyi mirwano.
FARDC mu itangazo ryayo yongera kuvuga ko ari “ingabo z’u Rwanda zateye DR Congo zihishe muri M23”, ibi birego leta y’u Rwanda yagiye ibihakana.
OCHA ivuga ko kuva muri Werurwe(3) uyu mwaka, abantu barenga 390,000 bavuye mu byabo kubera imirwano muri Rutshuru.
Src:BBC
