Kuri uyu wa Gatanu taliki 30 Kamena 2023, hasubitswe isomwa ry’urubanza ruregwamo Ishimwe Dieudone uzwi nka Prince Kid ahubwo hanzurwa ko hazaburanwa ku kimenyetso gishya kitari cyararegewe.
Urukiko Rukuru rwagombaga gusoma icyemezo ku bujurire bwatanzwe n’Ubushinjacyaha butanyuzwe n’icyemezo cy’Urukiko Rwisumbuye rwa Nyarugenge rwagize umwere Prince Kid.
Kuri uyu wa Gatanu abanyarwanda n’itangazamakuru bari babukereye bageze ku rukiko rukururu kuko aribwo hari hateganyijwe ko rusomwa ariko biza gutungurana hatangajwe ko hamaze kuboneka ikindi kimenyetso kitari mu byari byaratanzwe.
Urukiko Rukuru rwaburanishije urubanza rw’ubujurire, rwatangaje ko hari ikimeyetso gishya cyashyizwe muri sisiteme inyuzwamo ibiburanwa byose, cyagezemo tariki 23 z’uku kwezi kwa Kamena.
Ni ikimenyetso cy’amajwi Urukiko Rukuru rwafasheho umwanzuro,bivugwa ko ari ay’uregwa, afatwa nk’ikimenyetso kiri kwifashishwa n’Ubushinjacyaha, kigomba kuzaburanwaho n’impande zombie.
Nyuma y’isubikwa ry’uru rubanza , Urukiko rwategetse ko hazabaho kuburana kuri iki kimenyetso mu kwezi gutaha, tairki 14 Nyakanga 2023.Itegeko rigena imitangire y’ibimenyetso, riteganya ko igihe cyose urubanza rutarasomwa, hakaboneka ibimenyetso bishya, bitangwa, bikaburanwaho kugira ngo bigenderweho n’Urukiko mu gufata icyemezo.
