Ibikorwa bitandukanye byo kwitegura uzavamo Miss Rwanda 2022 birakomeje,Tariki 16 Werurwe 2022 Abakobwa 19 bagiye gutoranywamo Nyampinga w’u Rwanda 2022 bakoze ikizamini kijyanye n’ubumenyi bafite ku muco (Culture Challenge).
Nkibindi bikorwa byinshi bigenda bikorwa iki nacyo kije cyiyongera ku bindi bizamini bitangirwa ibihembo muri iri rushanwa nka Sports Challenge (ikizamini kijyanye no gushaka uhiga abandi muri siporo), Talent Show [kwerekana impano] na Most Innovative Project (umushinga uhiga indi).
Iki kizamini cy’umuco kigira uruhare mu bituma haboneka umukobwa wegukana ikamba rya Miss Heritage n’ubwo atari cyo cyonyine kibigena kuko hari n’akarusho k’imbyino abakobwa bashobora kugaragarizamo umuco no mu bindi bikorwa bagenda bakora bifite aho bihuriye n’umuco.Umukobwa ubaye Miss Heritage ahembwa na Bralirwa binyuze mu kinyobwa cya Primus, ahabwa miliyoni 5 Frw.
Iki kizamini kizakosorwa n’Inteko y’Umuco, ni yo izasuzuma ubumenyi bw’aba bakobwa mu myumvire bafite kuri izi ngingo ebyiri babajijweho.
Irushanwa rya Miss Rwanda rizasozwa ku wa 19 Werurwe 2022 mu birori bizabera ku Intare Conference Arena.
Kwinjira mu myanya isanzwe ni amafaranga ibihumbi 10 Frw, ibihumbi 20 Frw mu y’icyubahiro n’ibihumbi 50 Frw mu y’icyubahiro kirenze ku bazaba baguze amatike mbere.
Ku bazagurira amatike ku muryango, mu myanya isanzwe bizaba ari ibihumbi 20 Frw, ibihumbi 30 Frw mu y’icyubahiro n’ibihumbi 50 Frw mu myanya y’icyubahiro kirenze.
Kugeza ubu amatike yo kwinjira muri ibi birori yamaze gushyirwa ku isoko, buri wese wifuza kwitabira ibi birori yayigura anyuze kuri https://www.ticket.rw/
