Ikipe ya Real Madrid yaraye itanze ibyishimo ku bafana bayo aho yaraye yandagaje ikipe yo mu bwongereza ya Manchester City ikayitsinda ibitego 3-1 aho igiteranyo k’ibitego mu mikino yombi cyabaye ibitego 6-5.
Ibi byishimo bije byiyongera kukuba yari imaze iminsi yegukanye Shampiyona ya Espagne, La Liga.
Mu mukino ubanza, Manchester City yatsinze Real Madrid ibitego 4-3, ibyatumaga umukino wo kwishyura witegwa na benshi na cyane ko amakipe yombi yari agifite amahirwe.
Muri uyu mukino w’ishiraniro, amakipe yombi yatangiye yigana cyane ari nako abakinnyi ku mpande zombi bashotorana. Igice cya mbere cyarangiye nta buryo bufatika bubonetse ku makipe yombi, uretse ko Real Madrid yagisoje yinjiye mu mukino mu buryo bugaragara.
Mu gice cya kabiri, amakipe yombi yagerageje gusatirana ariko anatinyana, uburyo bwo kubona ibitego bukomeza kuba ingume. Umutoza Carlo Ancelotti yakoze impinduka ku munota wa 68 yinjizamo Rodrygo asimbuye Toni Kroos.
Manchester City ni yo yafunguye izamu ku munota wa 73 nyuma y’ishoti rikomeye ryavuyemo igitego cya Mahrez, amakipe yombi yakoze impinduka aho Manchester City yakuyemo ba kabuhariwe bayo nka Kevin De Bruyne wasaga nk’ufite imvune.
Ku munota wa 90 Real Madrid yishyuye iki gitego , gitsindwa na Rodrygo ku mupira mwiza yari ahawe na Karim Benzema, ari naryo shoti rya mbere rigana mu izamu ryari ritewe na Real Madrid.
Nyuma gato cyane y’iki gitego yari ibonye ntibyatinze kuko mu masegonda 90 habonetse ikindi gitego cya 2 gitsinzwe na Rodrygo ahawe umupira na Dani Carvajal.
Umukino warangiye mu minota 90 banganya ku giteranyo k’imikino yombi bituma hongerwaho iminota 30′.
Muri iyi minota Karim Benzema yakoreweho ikosa mu rubuga rw’amahina Real Madrid ibona penaliti ndetse ahita ayitsinda neza bituma ikipe igera ku mukino wa nyuma wa Champions League.
Real Madrid izahura na Liverpool FC zaherukaga guhurira ku mukino wa nyuma mu 2018, icyo gihe iki kipe yo muri Espagne yatsinze iyo mu Bwongereza ibitego 3-1.
Carlo Ancelotti uhiriwe nuyu mwaka w’imikino
Umutoza Pep Guardiola wa Manchester City ntabwo yiyumvishaka ibiri kuba ku ikipe ye
Thibaut Courtois yahembwe nk’umukinnyi w’umukino
