Nyuma y’umukino ubanza wa 1/2 cy’igikombe cy’Amahoro APR FC yaraye inganyijemo na Rayon Sports 0-0, hagaragaye gushyamirana hagati y’umutoza wa APR FC, Adil Erradi Mohammed na Paixão utoza Rayon Sports hafi gufatana mu mashati.
Umutoza wa Rayon Sports, yavuze ko atumva ukuntu Adil yagize uburakari bwinshi agatangira kumubwira iby’ibikombe yegukanye, ni mu gihe we yari agiye nta kibi kimutwaye.
Ati “Rimwe na rimwe mu mukino nta umwanya wanjye kubera ko njya gukina kandi ntashobora gukina, nakoreye ikosa mu rubuga rwa APR FC, nasabye imbabazi nyuma Adil ararakara mubwira gutuza kuko njye nubaha abantu, ambwira ibintu ntabasha kumva, ngo ndi umutoza, ndi umutoza, nanjye ndatekereza ndi umutoza, ndi umutoza wo ku rwego rwa UEFA Pro.”
“Nanjye mfite ibikombe aho natoje, sinzi impamvu yambwiraga ibikombe, nta kintu ndatsindira hano mu Rwanda ariko nziko iki gikombe nzagitwara na Rayon kandi biba bitandukanye iyo utwaye igikombe na Rayon Sports n’iyo ugitwaye na APR FC.”
Yakomeje avuga ko yubaha Adil kandi na we amwubaha, icyabaye kikaba ari ukutumvikana gusa nta kindi kibazo bafitanye.
Ati “Nubaha Adil, Adil aranyubaha (…) ntimukine ikinamico, nta kibazo kiri hagati yanjye na Adil, arashaka gutsinda nanjye ndashaka gutsinda.”
Biteganyijwe ko aya makipe azongera guhura mu cyumweru gitaha mu mukino wo kwishyura wa 1/2, ikipe izatsinda izagera ku mukino wa nyuma w’igikombe cy’Amahoro.
Kanda hano udukurikirane (Follow) kuri Facebook Page yacu, cyangwa ukande hano ukore subscribe kuri Youtube Channel yacu
Tubafitiye n’ibitabo by’abana iby’ikinyarwanda , igifaransa n’icyongereza . Uramutse wifuza kugurira umwana wawe igitabo watwandikira kuri : sopublishers@gmail.com cyangwa ukaduhamagara kuri : Tel: +250783203433,, +250783399900
