Umuririmbyi Robert Sylvester Kelly wamamaye nka R. Kelly mu rubanza rwasomewe i Brooklyn mu Mujyi wa New York,yakatiwe igifungo cy’imyaka 30 nyuma y’uko mu mwaka ushize yari yahamijwe ibyaha bitandukanye byiganjemo ibyo guhohotera abagore no gusambanya ku gahato abarimo abatarageza imyaka y’ubukure.
Uru rubanza mbere y’uko rusomwa, habanje gutangwa ubuhamya na bamwe bashinjaga uyu muririmbyi wamamaye muri R&B, bamwe basuka amarira bavuga ko yabangirije ubuzima.
Abantu bane bashinjaga R.Kelly banyuze imbere y’umucamanza bose bagaragaje ko nta n’umwe wifuza ko R.Kelly akatirwa imyaka mike ahubwo bakavuga ko akwiriye gukatirwa gufungwa burundu.
Ni mu gihe ubushinjacyaha bwo bwasabaga ko akatirwa imyaka iri hejuru ya 25 kandi ni nako byagenze kuko urukiko rwamukatiye igifungo cy’imyaka 30.
Abanganizi ba R.Kelly basabaga ko yakatirwa nibura imyaka 10 cyangwa munsi yayo kuko n’ubundi imyaka afite kumukatira 25 cyangwa irenga ntaho byaba bitaniye no kumukatira burundu.Banagaragaje impamvu y’uko uyu mugabo yagiye ahura n’ihohoterwa akiri muto ku buryo bishobora kuba byaramugizeho ingaruka.
Umuhanzi R.Kelly yashinjwaga ibyaha byo gukoresha abana imibonano mpuzabitsina, gushimuta, gukoresha abantu ku gahato, kwambukiranya Leta zitandukanye ajyanye abagore mu bikorwa byo kubasambanya n’ibindi.
R.Kelly yatawe muri yombi mu 2019 ubwo yashinjwaga ibi byaha twavuze haruguru.
Imanza za R.Kelly ntizirarangira kuko afite urundi rubanza muri Kanama i Chicago muri Leta Illinois ndetse nurundi muri Leta ya Minnesota.
