Umuhanzi w’umunyarwanda Mugisha Benjamin (The Ben) ukorera umuziki muri Leta Zunze Ubumwe za Amerika, ategerejwe mu gitaramo cyiswe ‘Rwanda Rebirth Celebration’ kigamije kwishimira ibyo abanyarwanda bagezeho kugeza uyu munsi.
Tariki 6 Kanama 2022 nibwo uyu muhanzi w’icyamamare ategerejwe kuri Canal Olympia ku i Rebero nyuma y’iminsi itari mikeya adataramira Abanyarwanda.
Ubwo yaherukaga mu Rwanda yari yaje gutarama mu gitaramo kiswe East Africa Party muri Mutarama 2020 muri BK Arena aho yari kumwe n’abahanzi barimo Bushali, Igor Mabano, Nel Ngabo, Butera Knowless, King James, Bull Dogg, Andy Bumuntu,Bruce Melodie, Riderman n’abandi.
Iki gitaramo Rwanda Rebirth Celebration cyateguwe na East Gold, kompanyi isanzwe ikora ibijyanye n’umuziki.
Umwe mubari gutegura iki gitaramo yatangaje ko bifuje gutumira umuhanzi The Ben kubera ko ari umuhanzi w’umunyarwanda ufite izina rikomye bumva ko azafasha abanyarwanda kwishimira ibyinshi bagezeho.
Yagize ati “Twaravutse, nta munyarwanda ushishikajwe n’ibintu by’amafuti. Kuko twaragutse mu mitekerereze, mu mikorere, uburezi kuri bose, amashuri kuri bose, amahirwe kuri bose, ubuzima kuri bose n’ibindi. The Ben rero, ni umuhanzi Mukuru uzadufasha kwishimira urugendo rw’iterambere rw’u Rwanda.”
Byari byitezwe ko iki gitarmo kiba mu gihe cy’Inama y’Abakuru b’Ibihugu na za Guverinoma Commonwealth izwi nka CHOGM bihinduka ku munota wa nyuma.
Hanatangajwe kandi ko hari abandi bahanzi bazaba bari muri iki gitaramo baba nyarwanda,ariko bakaba bazatangazwa nyuma
Iki gitaramo kizaba hasozwa imikino y’abakanyujijeho mu Rwanda. Igitaramo kizaba mu masaha y’umugoroba, ni mu gihe mu gitondo cy’uwo munsi ari bwo imikino izaba, yasojwe ndetse abayitabiriye bazashyikirizwa ibihembo mu gitaramo.
Aba nyarwanda bari banyotewe no kongera gutaramirwa na The Ben
Kanda hano udukurikirane (Follow) kuri Facebook Page yacu, cyangwa ukande hano ukore subscribe kuri Youtube Channel yacu
