Kuri uyu wa Gatandatu taliki 17 Nyakanga 2021 ni bwo hasojwe imikino y’akarere ka 5 yo gushaka itike y’imikino ya nyuma y’Afurika mu mukino wa Basketball mu cyiciro cy’abagore “FIBA Women’s Afrobasket 2021 Zone 5 Qualifiers”.
Ikipe y’igihugu ya Kenya nyuma yo kwitwara neza igatsinda Misiri ku mukino wa nyuma ni yo yegukanye igikombe ndetse inabona itike yo kuzahagararira Akarere ka 5 mu mikino y’Afurika.
Iyi mikino yabereye mu Rwanda kuva tariki 12 kugeza 17 Nyakanga 2021 yari yitabiriwe n’amakipe ari yo u Rwanda, Misiri, Kenya na South Sudan.
Ikipe ya Kenya yatsinze ku mukino wa nyuma Misiri amanota 99 kuri 83. Agace ka mbere Kenya yatsinze amanota 29 kuri 24 itsinda aka kabiri ku manota 21 kuri 18, agace ka gatatu izi kipe zinganya amanota 27 kuri 27 naho agace ka 4, Kenya itsinda Misiri amanota 22 kuri 14.
Umukinnyi Victoria Reynolds wa Kenya ni we witwaye neza aho yatsinze amanota 25 anatanga imipira 6 yavuyemo amanota.
Mu mukino w’amajonjora ikipe ya Misiri yari yatsinze Kenya bigoranye amanota 107 ku 106. Kenya yageze ku mukino wa nyuma isezereye ikipe y’u Rwanda muri ½ naho Misiri isezerera ikipe ya South Sudan.
Mu guhatanira umwanya wa 3, ikipe y’u Rwanda yatsinze South Sudan amanota 83 kuri 56. Agace ka mbere ikipe y’u Rwanda yatsinze South Sudan amanota 31 kuri 14, itsinda aka kabiri ku manota 23 ku 09, agace ka gatatu South Sudan yatsinze ikipe y’u Rwanda amanota 16 ku 8 mu gihe agace ka 4, ikipe y’u Rwanda yatsinze amanota 21 kuri 14.
Umukinnyi w’ikipe y’u Rwanda, Tetero Odile ni we watsinze amanota menshi muri uyu mukino (21) naho kapiteni w’ikipe y’u Rwanda, Tierra Monay Henderson aba umukinnyi watanze imipira myinshi yavuyemo amanota (8).
Ikipe ya Kenya nyuma yo kwegukana igikombe yahise ibona itike yo kuzitabira imikino y’Afurika “FIBA Women’s AfroBasket 2021″ izabera muri Cameroun kuva taliki 17 kugera 26 Nzeri 2021.
Iyi kipe ya Kenya mu gushaka itike y’imikino y’Afurika ya 2019 na bwo yahuye na Misiri aho yatsinzwe umukino wa nyuma gusa ihabwa ubutumire bwo kwitabira imikino y’Afurika. Uyu mwaka, ikipe ya Misiri yabaye iya kabiri ni yo ishobora guhabwa ubutumire.
Ikipe y’u Rwanda imaze kwitabira iyi mikino inshuro 2, muri 2009 na 2011.
