Minisiteri y’Ubuzima yatangaje ko igiye gutanga doze ya kabiri y’urukingo rushimangira, hakazatangirirwa ku bantu barengeje imyaka 60 n’abandi bafite intege nke z’umubiri.
Ni icyemezo cyafashwe mu gihe imibare y’abandura ikomeza kuba hasi, nubwo COVID-19 yo ikomeza gukwirakwira.urugero nko kuri uyu wa Kane handuye abantu 15, bangana na 0.5%.
Minisiteri y’Ubuzima yagize iti “Guhera ku wa mbere tariki ya 08.08.2022 iyi doze izatangira gutangwa kuri site zose z’ikingira hibandwa ku bakuze bari hejuru y’imyaka 60 n’abandi bafite intege nke z’umubiri.”
Umunyamabanga wa Leta muri Minisiteri y’Ubuzima, Dr Mpunga Tharcisse, yatangaje ko gahunda yo gutanga doze ya kabiri ishimangira y’urukingo rwa COVID-19 izatangirira ku bafite imyaka 60 no hejuru yayo, n’abandi bafite intege nke z’umubiri bitewe n’uburwayi bafite.
Yakomeje ati “Virus ya COVID-19 igenda hindagurika kandi inkingo dukoresha zakozwe hagendewe kuri virusi yari iriho icyorezo kicyaduka. Twatangije gahunda doze ya kabiri ishimangira y’urukingo rwa COVID-19 duhereye ku bakuze n’abadi bafite intege nke mu mubiri.”
Imibare ya Minisiteri y’ubuzima igaragaza ko abantu bamaze guhabwa inkingo ebyiri za COVID-19 mu Rwanda ari 8,870,113 (97.9%), mu gihe abahawe n’urundi rukingo rumwe rushimangira ari 5,269,254 (58.1%). Abamaze kwicwa n’iki cyorezo mu Rwanda ni 1466.
Ubushakashatsi bwerekanuye ko abantu bahabwa inkingo nyinshi za COVID-19 bigenda bigabanya ibyago byo kwanudura no kuzahazwa n’iyi ndwara.
Ubushakashatsi bwakorewe muri Israel, igihugu kiri mu bimaze gutanga inkingo nyinshi za COVID-19, bwerekanye ko nk’abaganga bamaze guhabwa inkingo enye bafite ibyago bike cyane byo kwandura.
Ni ubushakashatsi bwatangajwe mu kinyamakuru cya American Medical Association ku wa Kabiri.
Bwerekanye ko nk’abaganga bahawe inkingo enye za mRNA (Pfizer cyangwa Moderna), bagezweho n’ubwandu kuri 7%, mu gihe abahawe inkingo eshatu, urwa gatatu bakaruhabwa kugeza mu mpera za Nzeri umwaka ushize, banduye kuri 20%.
Leta zunze ubumwe za Amerika yo irimo kugira ihame urukingo rwa gatatu (urwa mbere rwo gushimangira) ku bantu baregeje imyaka itanu.
Ni mu gihe abarengeje imyaka 50 bemererwe urukingo rwa kabiri rwo gushimangira, cyangwa abantu barengeje imyaka 12 bafite ubundi burwayi bukomeye.
Kugeza ubu inkingo zitangwa muri doze zo gushimangira ni iza Pfizer-BioNTech, Moderna na Jansen.
Umunyamabanga wa Leta @DrMpunga yatangaje ko gahunda yo gutanga doze ya 2 ishimangira y'urukingo rwa #COVID19 izatangirira ku bafite imyaka 60 no hejuru yayo n'abandi bafite intege nke z'umubiri bitewe n'uburwayi bafite. pic.twitter.com/0bRJJjds3t
— Ministry of Health | Rwanda (@RwandaHealth) August 4, 2022
U #Rwanda rwatangije gahunda yo gutanga doze ya 2 ishimangira y'urukingo rwa #COVID19. Guhera ku wa mbere tariki ya 08.08.2022 iyi doze izatangira gutangwa kuri site zose z'ikingira hibandwa ku bakuze bari hejuru y'imyaka 60 n'abandi bafite intege nke z'umubiri. #IrindeUndide pic.twitter.com/gnsgt2IwHT
— Ministry of Health | Rwanda (@RwandaHealth) August 4, 2022
