Rutahizamu Pierre-Emerick Aubameyang wa Arsenal ariko akaba amasezerano yarafitanye niy’ikipe yari yarangiye, yerekeje muri Barcelona nk’umukinnnyi utari ugifite amasezerano nyuma yo kuva muri Arsenal, kugenda kwe bikaba byitezwe gutangazwa ku mugaragaro kuri uyu wa kabiri.
Pierre-Emerick ukomoka muri Gabon, w’imyaka 32, yasinye amasezerano ku wa mbere nijoro.
Uyu mukinnyi yari amaze igihe afitanye ibibazo aho mu kwezi kwa cumi na kabiri ubwo yahanwaga na Arsenal kubera kurenga ku mategeko y’imyitwarire myiza, Aubameyang nta mukino yongeye kuyikinira, ariko mbere yaho yari amaze kuyitsindira ibitego 92 mu mikino 163.
Uyu rutahizamu Yari yavuzweho ko ashobora kwerekeza mu ikipe ya Al-Nassr yo muri Arabie Saoudite (Saudi Arabia),ariko byarangiye Barcelona imwegukanye.
Aubameyang yari yavuye muri Borussia Dortmund yo mu Budage mu 2018 imuguze miliyoni 56 z’amapawundi .
Kugeza ubu Mikel Arteta umutoza wa Arsenal asigaranye ba rutahizamu babiri gusa aribo, Alexandre Lacazette na Eddie Nketiah mu gihe gisigaye cy’uyu mwaka w’imikino.
