Diyabete ni indwara iteje ikibazo, ndetse kuri ubu bamwe basigaye bayitinya kurenza uko batinya SIDA. Ni mu gihe kuko ni indwara igutegeka ibyo ugomba kurya n’ibyo ugomba kureka, igutegeka kugira imyitwarire runaka uhindura, muri macye kurwara diyabete bigusaba guhindura byinshi.
Abagabo bamwe irabakona, gutera akabariro bakabyibagirwa.
Abandi ituma imitsi ijya mu mano yangirika, bikaba ngombwa ko amano acibwa
Hari n’abaraza ibirenge mu mazi ngo barebe ko babona agatotsi kuko biba bishyushye cyane.
Impamvu nyamukuru zitera diyabete zishingiye ku ikoreshwa ry’umusemburo wa insuline mu mubiri. Hamwe bishobora guterwa nuko insuline yabaye nkeya mu mubiri, ahandi bigaterwa nuko umubiri utari kubasha gukoresha insuline ufite. Imikoresherezwe ya insuline mu mubiri akenshi ikaba ihungabanywa n’umubyibuho udasanzwe kimwe na stress.
Iyo umubiri uhagaritse gukora uyu musemburo wa insuline, byitwa diyabete yo mu bwoko bwa mbere (Type 1 diabetes) naho iyo umubiri wananiwe gukoresha insuline ihari byitwa diyabete yo mu bwoko bwa kabiri (Type 2 diabetes).
Hari ubundi bwoko bwa diyabete twashyira mu bwoko bwa gatatu, iyi akaba ari diyabete ikunze gufata abagore bafite inda nkuru, hejuru y’amezi 5. Gusa iyo amaze kubyara ihita yikiza. Ariko ntitwabura kuvuga ko umugore urwara iyi diyabete atwite aba afite ibyago byinshi byo kuzarwara diyabete yo mu bwoko bwa 2.
Kurwara diyabete bishobora kuba:
- Akoko
- Guterwa n’umubyibuho udasanzwe
- Stress ndetse no
- Kutabasha gukoresha neza ibyo turiye mu mubiri.
Nubwo insuline kuri ubu iboneka nk’inshinge zo kwitera, ndetse hakabaho n’ibinini binyuranye bikoreshwa mu guhangana n’iyi ndwara, ariko diyabete ya 1 n’iya 2 ziba karande. Mu yandi magambo ugomba guhora ukoresha imiti ubuzima bwawe bwose.
Nyamara kandi hari uburyo ushobora guhindura mo imirire yawe n’iminywere yawe bityo ukabasha guhangana n’ubu burwayi.
Hano twaguteguriye ibiribwa n’ibinyobwa byagaragajwe n’ubushakashatsi ko kubikoresha byagufasha gutandukana burundu n’ingaruka zose ziterwa na diyabete. Muri macye, si ifunguro wemerewe gusa, ahubwo ni ibyatuma igipimo cya insuline mu mubiri kiguma ku rugero rukwiye.
Amafunguro yagufasha guhangana na diyabete
-
Apple cider vinegar
Iyi ni vinaigre itari nka ya yindi isa n’amazi, kuko iyi yo ituruka mu mbuto za pomme. Akamaro kayo k’ingenzi ni ukuringaniza igipimo cy’isukari mu mubiri. Ikindi kandi inafasha mu kugabanya ibiro, dore ko diyabete yibasira ahanini ababyibushye bidasanzwe. Ibiyiko bibiri byayo, ukaminjagiramo akunyu ufatiye hagati y’intoki ebyiri, noneho ukavanga mu kirahure cy’amazi. Ukabikora buri gihe mbere yo kurya.
2. Cinnamon
Abarwaye diyabete yo mu bwoko bwa 2 iyi ni ingenzi kuri bo. Iyo igeze mu mubiri ifasha impindura gukora insuline ihagije bityo ikamanura igipimo cy’isukari. Ushobora kuvanga iyi fu mu cyo kunywa cyaba icyayi, igikoma cyangwa amazi, ndetse ushobora no kurigata iyi fu. Ubikora byibuze iminsi 40.
3. Amazi
Kunywa amazi ku rugero rwiza bifasha umubiri gukoresha isukari idakenewe cyane nk’isoko y’ingufu. Ikindi ni uko amazi atuma imyanda n’uburozi biri mu mubiri bisohoka bityo n’isukari idakenewe igasohoka mu nkari.
4. Izuba
Nubwo kubyumva bitangaje, ariko umuti w’ingenzi wa diyabete ni ukubona izuba mu buzima bwawe. Tuzi ko imirasire yaryo ituma tubona vitamini D, nyamara burya si ibyo rikora gusa kuko rinafasha mu ikorwa rya insuline. Akazuba ka mu gitondo ku gasusuruko cyangwa ka kiberinka kukota ni ingenzi kuri wowe urwaye diyabete. Gusa uzirinde kwitara ku izuba ry’igikatu kuko ryagutera kanseri y’uruhu.
5. Igikakarubamba
Kuba igikakarubamba gikungahaye kuri phytosterols bituma kiba ingenzi mu guhangana na diyabete. Izo phytosterols nizo zifasha mu gutuma igipimo cy’isukari mu mubiri kimanuka. Bamwe bakivanga n’icyinzari mu guhangana na diyabete. Uvanga akayiko k’umushongi w’igikakarubamba n’akayiko k’ifu y’icyinzari mu kirahure cy’amazi. Ukajya ubikora mu gitondo no ku mugoroba.
6. Ibibabi by’imyembe
Ufata ibibabi 4 by’imyembe ukabicanira mu mazi yuzuye ikirahure. Ukanywa ayo mazi buri gitondo. Ushobora no kwanika amababi ugakoramo ifu. Ukajya ufata agace k’akayiko gato buri gitondo no ku mugoroba, mu mazi yuzuye ikirahure.
7. Ibibabi bya curry
Guhekenya aya mababi kuva na kera bizwiho kongera igipimo cya insuline mu mubiri. Bityo bikagabanya ibyago byo kurwara diyabete. Si ibyo gusa kuko binabuza ikorwa ry’isukari mu mubiri binyuze mu ishwanyaguzwa rya amidon (starch), imwe mu mpamvu zitera diyabete. Si ibyo gusa kuko binagabanya igipimo cya cholesterol mu mubiri ndetse n’umubyibuho udasanzwe Ikoreshwa mu kurinda no kuvura diyabete.
8. Alfalfa
Iki kimera kijya gusa n’ubunyobwa ku bibabi, imbuto zacyo ziseye ni umuti mwiza ufasha kugabanya igipimo cy’isukari mu mubiri. Ufata akayiko k’ifu mbere yo kurya cyangwa uri kurya. Wakavanga n’ifunguro (kuminjira) cyangwa mu mazi yuzuye ikirahure.
9. Umunyu mucye
Ubushakashatsi bwa vuba bwerekanye ko kurya umunyu mwinshi byongera ibyago byo kurwara indwara z’umutima ku barwaye diyabete. Niyo mpamvu ari byiza kugabanya umunyu mu byo kurya mu gihe urwaye diyabete.
10. Bitter Gourd
Banayita bitter melon, twagereranya n’umutanga mu kinyarwanda (ariko si wo). Uru rubuto rutuma impindura ibasha gukora insuline ihagije bityo bikagabanya isukari mu mubiri. Fata izi mbuto eshatu, ukuremo utubuto tw’imbere utujugunye noneho ukamuremo umutobe. Buri gitondo nta kindi urarya uwo mutobe uwuvange n’amazi unywe.
11. Fenugreek
Imbuto za fenugreek zizwiho gufasha mu ikorwa rya insuline bityo bigakuraho ibyago byo kurwara diyabete. Icyo usabwa ni ukwinika utubuto twuzuye ibiyiko bibiri mu mazi ushobora kunywa ukayamara (byibuze igice cya litiro), bikararamo ijoro ryose. Mu gitondo unywe ya mazi, n’imbuto ntuzijugunye ariko.
12. Jamun
Imbuto zihiye nizo zikoreshwa. Fata garama 60 zazo maze ucanire mu mazi azirengeye. Ucanire igihe kinini kugeza bibaye nk’igikoma noneho ubicucume. Ugabanyemo ibice 3 bingana, bimwe ubirye mu gitondo, ibindi ku manywa ibindi nijoro. Izi mbuto zizwiho kuba zikize kuri glycosides na alkaloids bizwiho kuringaniza igipimo cy’isukari mu mubiri.
13. Siporo
Iyo dukora siporo umubiri wacu ukoresha ingufu nyinshi kandi izo ngufu nta handi zituruka uretse mu isukari iri mu mubiri. Iyo rero ukora siporo, isukari yari yibitse mu mubiri irakoreshwa bityo igipimo cyayo mu maraso kikagabanuka. Byibuze iminota 30 buri munsi ya siporo irahagije. Siporo nziza ni ugutwara igare, koga, gusimbuka umugozi no kwiruka buhoro buhoro, ushobora no kugana gym abatoza bakaba bagukoresha siporo. Si ibyo gusa kuko siporo izanagufasha gutakaza ibiro no kugira umubiri ukomeye. Nyuma ya siporo usabwa kunywa amazi ahagije mu cyimbo cy’ibindi byongera isukari mu mubiri.
Ntabwo twabivuga byose muri iyi nkuru ngo tubirangize ariko ibi nibyo by’ingenzi usabwa. Ku biribwa n’ibinyobwa si ngombwa byose, icyo wabona hafi yawe nicyo wakoresha na cyane ko hari ibyo twavuze bigoye kubibona iwacu.
Ntitwasoza tutavuze ko kuruhuka bihagije, kugabanya stress no guhangayika nabyo ari bimwe mu byagufasha guhangana n’iyi ndwara.
Src:https://umutihealth.com/
Kanda hano udukurikirane (Follow) kuri Facebook Page yacu, cyangwa ukande hano ukore subscribe kuri Youtube Channel yacu
Tubafitiye n’ibitabo by’abana iby’ikinyarwanda , igifaransa n’icyongereza . Uramutse wifuza kugurira umwana wawe igitabo watwandikira kuri : sopublishers@gmail.com cyangwa ukaduhamagara kuri : Tel: +250783203433, +25078339990
