Umuhanzi ukomoka mu gihugu cya Uganda ufite izina rikomeye mu muziki haba mu karere ndetse no muri Afurika Eddy Kenzo, kuri uyu wa Kabiri tariki 26 Nyakanga 2022 yagaragaye i Nyamirambo kuri Stade ya Mumena ari guconga ruhago, nyuma gato y’imyitozo ya Kiyovu sports.
Eddy Kenzo yahishuye ko ari mu Rwanda muri gahunda zitandukanye zirimo no kureba impano z’abakiri bato mu mupira w’amaguru akabajyana mu ishuri rye ryigisha uyu mukino rizwi nka ’Big Talent.’
Ati “Yego ndi umukinnyi w’umupira w’amaguru, natangiye kera mu ishuri ry’umupira rya Sports Club Villa. Nyuma y’umuziki ndi n’umushoramari, mfite imishinga ndi gukora mu Rwanda, nubwo ndi gukina hano ariko naje no kureba abana bafite impano. Ndebe ko hari abo najyana mu ishuri ryanjye bakiga banakina umupira w’amaguru. Ndashaka kujya dutangira gukina imikino ya gicuti mu Rwanda. Ikindi mfitanye imikoranire na ’Victor Wanyama,’ turashaka gukoresha amazina yacu mu guha aba bana ejo hazaza heza.”
Uyu munyamuziki yongeyeho ko ishuri rye rimaze gukomera kuko ritanga abakinnyi muri KCCA, mu Bufaransa, muri Portugal ndetse n’ahandi.
Eddy Kenzo ari mu Rwanda kuva mu mpera z’icyumweru gishize, amakuru akavuga ko ari no gukorana indirimbo na Platini,aho muri iyi minsi ari kugenda akorana indirimbo n’abanyarwanda dore ko iheruka yayikoranye n’umuhanzi Bruce Melodie yitwa Nyoola.
Platini yagaragaye yaherekeje Eddy Kenzo ku kibuga
