Menya ibintu byagufasha kugira ubuzima bwiza bidasaba umwanya munini kuko hari benshi bavuga ko batabona umwanya uhagije wo kwiyitaho no kubungabunga ubuzima bwabo.
Kwita ku buzima, kugira ubuzima buzira umuze cyangwa se kubaho neza bisaba ubushake bwa nyirabwo. Gusa ntibigomba kugutwara igihe cyawe cyose.
Hari ibintu byoroshye kandi bidasaba igihe kirekire ushobora gukora bikagufasha guhorana ubuzima bwiza, kubikora ntibisaba ibintu bihambaye cyangwa se umwanya munini, kuko iminota 10 cyangwa munsi yayo iba ihagije gusa, ubundi ugahorana ubuzima buzira umuze.
Dore ibintu 7 byagufasha kwita ku buzima mu gihe gito cyane nk’uko byatangajwe n’ikinyamakuru Health Line:
1.Kugendana icupa ry’amazi
Kurinda umubiri wawe kubura amazi ni ingenzi cyane. Bifasha mu mikorere myiza y’ingingo z’ingenzi ku mubiri; urwungano rw’ubwirinzi (immune system), impyiko, urwungano ngogozi (digestive system) ndetse n’indi mikorere mu mubiri.Aha ntituvuze kugendana icupa ry’amazi ririmo ubusa, ahubwo kugendana icupa bizagufasha kunywa amazi aho ugeze hose (yaba ku kazi, aho wicaye mu rugo cyangwa se uri gukora sport), ndetse bikwibutse kenshi ko ugomba kuyanywa.
2.Guseka byibuze umunota 1
Guseka ni ingenzi ku buzima. Umunota umwe umara uri guseka, uba uhagije kugira ngo ugabanye stress ndetse unafashe imikaya kuruhuka neza. Mu gihe ukunda guseka kenshi buri munsi, bifasha amaraso gutembera neza, igipimo cy’isukari mu maraso kigahora ku rugero rukwiye ndetse no kubaho igihe kirekire.
3.Kunywa icyayi
Ubushakashatsi bwakozwe ku binyabutabire biboneka mu cyayi, bugaragaza ku kukinywa iminota byibuze 3, bifasha kwinjiza mu mubiri ibinyabutabire bifite ubushobozi bwo gusukura umubiri, polyphenols, n’ibindi bifasha mu mikorere myiza.Icyayi tuvuga ntikigomba kuba kirimo isukari, udashoboye kukinywa ushobora kongeramo ubuki.
4.Kora urugendo ruto n’amaguru
Kugenda n’amaguru iminota micye burya bikiza ibintu byinshi cyane. Umwuka mwiza ugenda winjiza ugufasha kurwanya stress kandi ugafasha ubwonko bwawe guhindura imitekerereze. Bituma amaraso yawe atembera neza, bityo bikakurinda imvunane no kuribwa mu ngingo zitandukanye biterwa no kwicara cyangwa kuryama
igihe kirekire.
5.Kurya kenshi utubuto duto
Utubuto duto tuvugwa aha ni; ubunyobwa, sesame, soya, cashew, n’utundi. Abantu bakunze kurya utubuto duto kenshi, usanga badakunze kwibasirwa n’indwara z’umutima, cancer, indwara zifata imyanya y’ubuhumekero, n’izindi zose zihindura imikorere y’umubiri.
6.Ruhuka gato
Hari igihe uba uri mu kazi ukumva uri gusinzira, ntukeneye amasaha menshi kugira ngo wumve uruhutse kuko iminota 10 ihagije, ngo umubiri wawe wongere ubone ibyiza byinshi ubonera mu kuruhuka gato bizwi nka sieste cyagwa nap. Kuruhuka gato bifasha ubwonko kongera gukora neza, guhanga udushya, kwibuka cyane ndetse no gutanga umusaruro. Mu gihe uri kuruhuka gato, ntugomba kurenza iminota 10, kuko iyo uyirengeje, na none utangira kumva urushye cyane cyangwa se wumva wacitse intege iyo ubyutse.
7.Kumva umuziki
Kumva umuziki bituma wimukira mu isi yawe, ukibagirwa ibindi byose. Niba ufite ecouteurs/headphones ukaba ufite akanya gato, ntacyakubuza gushyiramo indirimbo wishimira. Kumva indirimo ukunda cyangwa se izindi zigenda gahoro, bifasha kukoongerera akanyamuneza ndetse no guseka. Ibi byose bivuzwe hejuru, nta na kimwe gihambaye cyangwa se ngo gisabe igihe kinini kugikora. Gukora ibi byose bizagufasha kwita ku buzima bityo uhorane ubuzima buzira umuze kandi bikurinde n’indwara zitandukanye.
Kanda hano udukurikirane (Follow) kuri Facebook Page yacu, cyangwa ukande hano ukore subscribe kuri Youtube Channel yacu.
Tubafitiye n’ibitabo by’abana iby’ikinyarwanda , igifaransa n’icyongereza . Uramutse wifuza kugurira umwana wawe igitabo watwandikira kuri : sopublishers@gmail.com cyangwa ukaduhamagara kuri : Tel: +250783203433,, +250783399900.
