Rutanga Eric usanzwe umenyerewe muri Ruhago nyarwanda ubu akaba ari myugariro wa Police FC, ku cyumweru tariki 6 Werurwe 2022 yakoze ubukwe na Umunyana Shamsi Sultan bari basanzwe babana nk’umugore n’umugabo.
Ni ubukwe bwatashywe n’ibyamamare bitandukanye,birimo bagenzi be bakina umupira w’amaguru,abahanzi ndetse nabandi batandukanye bamenyerewe mu byidagaduro mu Rwanda.
Ubu bukwe bwa Rutanga na Shamsi Sultan, bwateguwe kare ariko kubera icyorezo cya Covid-19 bugenda buhindurirwa itariki,aho bwari buteganyijwe ko bwaba tariki 25 Ukuboza 2021.
Queen Land Park i Kanombe niho habereye umuhango wo gusaba no gukwa ,ndetse abatumiwe ni naho bakiriwe.
Rutanga Eric yari agaragiwe n’umunyamakuru David Bayingana ( Parrain), yambariwe n’abakinnyi barimo Nshuti Innocent wa APR FC, Biramahire Abeddy wa AS Kigali na Kimenyi Yves wa Kiyovu Sports.
Muzika kandi nayo ntiyahatanzwe kuko umuhanzi Yverry yaje kuririmba muri Reception,cyane ko yari yanamwambariye mu muhago wo gusaba no gukwa.
Si Yverry gusa waririmbye muri ubu bukwe kuko Yvan Buravani inshuti magara ya Rutanga nawe yaririmbye aho yanasabye Rutanga ko nawe yakora munganzo akaririmbira umugore we.
Kugeza uyu munsi Rutanga Eric akinira Police FC kuva mu mpeshyi ya 2020 aho yayigezemo avuye muri Rayon Sports mu gihe yamenyekanye akinira APR FC yakuriyemo.
Rutanga n’umugore we bafashe ifoto n’ababyeyi ba Shamsi Umunyana Sultan
Nyuma yo guha impano ababyeyi ba Rutanga na bo bahise bafata ifoto y’urwibutso
Ababyeyi babo babambitse amakamba, babashimira uburere babahaye
Kimenyi Yves na we yari mu bambariye Rutanga Eric bakuranye
Yvan Buravan ni inshuti magara ya Eric Rutanga.
Rutanga nawe yakoze mu nganzo aririmbira umugore we Umunyana Shamsi Sultan
