Umutoza wungirije wa Misiri, Diaa Al-Sayed, yasabye CAF ko yakwigiza inyuma umukino wa nyuma w’Igikombe cya Afurika bazahuramo na Sénégal ugakinwa ku wa Mbere.
Umutoza wungirije Diaa al-Sayed ni we wagiye mu kiganiro n’abanyamakuru nyuma y’umukino wa Cameroun kuko umutoza mukuru Carlos Queiroz yari yahawe ikarita itukura.
Uyu mutoza yavuze ibitari byitezwe na benshi ubwo yasabaga CAF kwigiza inyuma amasaha 24 umukino wa nyuma bazahuramo na Sénégal uteganyijwe ku Cyumweru, ukaba wakinwa ku wa Mbere.
Ati “Ndasaba CAF ko umukino wa nyuma wakinwa ku wa Mbere. Hari umunsi urenzeho Sénégal yagize wo kuruhuka, nifuza ko nk’uko umukino w’umwanya wa gatatu wigijwe imbere (ukava ku Cyumweru ukajya ku wa Gatandatu), wakinwa ku wa Mbere”.
Misiri yasabye ibi nyuma yo gukina iminota myinshi muri ¼ aho yasezereye Maroc ku bitego 2-1 habanje kwitabazwa iminota 120.
Muri ½ na bwo yasezereye Cameroun kuri penaliti nyuma yo kunganya ubusa ku busa mu minota 120.
Kuri uyu wa Gatandatu ni bwo Cameroun na Burkina Faso zikina umwanya wa gatatu guhera saa tatu mu gihe Misiri na Sénégal zizakina umukino wa nyuma ku Cyumweru na bwo guhera saa tatu z’ijoro.
