Ishyirahamwe ry’umupira w’amaguru i Burayi (UEFA)ryasabye imbabazi abafana ba Liverpool n’abafana ba Real Madrid bagizweho ingaruka n’ibyabaye ku mukino wa nyuma wa Champions League, inavuga ko bitagomba kuzongera kubaho.
Abafana ba Liverpool bavuze ku kuntu polisi yakoresheje imbaraga z’umurengera, ku kajagari mu mitegurire ndetse no ku bantu benshi kurenza urugero bari kuri uwo mukino wa nyuma wo ku wa gatandatu ushize.
Real Madrid yasabye ibisobanuro ku “rukurikirane rw’ibintu bibabaje”.
Mu itangazo UEFA yavuze ko “nta mufana w’umupira w’amaguru ukwiye gushyirwa mu bintu nka biriya, kandi ntibigomba kuzongera kubaho”.
“UEFA irifuza gusaba imbabazi ibikuye ku mutima abafana bose bakorewe cyangwa babonye ibintu biteye ubwoba mbere y’umukino wa nyuma wa Champions League kuri Stade de France ku itariki ya 28 y’ukwezi kwa gatanu 2022 i Paris, mu ijoro ryagakwiye kuba ryarabaye kwishimira umupira w’amakipe y’i Burayi”.
Perezida w’Ubufaransa Emmanuel Macron yavuze ko abari bafite amatike babujijwe n’abashinzwe umutekano kwinjira ku kibuga bagomba gusubizwa amafaranga yabo “mu buryo bwihuse cyane bushoboka”.
Macron yagize ati: “Ndazirikana imiryango yasiragijwe, itarashoboye kugera mu ntebe yari yishyuriye.
“Nasabye guverinoma gusobanura ibyabaye, kumenya ababikoze no gusobanurira mu buryo burambuye abo dusangiye igihugu uruhare abo bagize mu byabaye, kubisobanurira Abongereza n’Abanya-Espagne”.
Mbere, UEFA yari yatangaje ko yasabye akanama kigenga kuyikorera raporo ku byabaye mbere y’uwo mukino wa nyuma – Real yegukanyemo igikombe itsinze Liverpool 1-0, ndetse yari yavuze ko hakwiye kugira amasomo yigirwa mu byabaye.
Kazayoborwa na Dr Tiago Brandao Rodrigues wo muri Portugal.
Abategetsi bo mu Bufaransa n’abategetsi bo muri UEFA bari bavuze ko abafana bageze ku kibuga bacyererewe hamwe n’amatike mpimbano ari byo byateje akajagari hanze ya Stade de France, bigatuma umukino utinzwaho iminota irenga 30.
Polisi yakoresheje imyuka iryana mu maso n’irimo urusenda mu gutatanya abafana bamwe na bamwe. Byanamenyekanye ko abafana banibasiwe n’ibico by’abagizi ba nabi baho.
Minisitiri w’ubutegetsi bw’igihugu w’Ubufaransa Gérald Darmanin yari yavuze ko abafana b’Abongereza ari bo bonyine bateje ibibazo kuri uwo mukino wa nyuma.
Itangazo rya UEFA ryongeyeho riti: “Igenzura rizashaka kumenya ishusho yuzuye n’igihe ibyabaye byabereye kuri uwo munsi, haba mu kibuga no mu duce two mu nkengero zacyo, harimo no gusuzuma uko abafana bageze ku kibuga banyuze aho kwinjirira”.
Umunyabigwi wa Liverpool Sir Kenny Dalglish yavuze ko uko gusaba imbabazi kwa UEFA ari “intangiriro”, ariko yongeraho ati: “Haracyari inzira ndende.
“Uku gusaba imbabazi ntigukuraho ubutumwa butari ukuri bujyanye no gucyerererwa kw’umukino, ibyabereye aho abafana baba bari, cyangwa ibyabaye nyuma yaho”.
Kanda hano udukurikirane (Follow) kuri Facebook Page yacu, cyangwa ukande hano ukore subscribe kuri Youtube Channel yacu
Tubafitiye n’ibitabo by’abana iby’ikinyarwanda , igifaransa n’icyongereza . Uramutse wifuza kugurira umwana wawe igitabo watwandikira kuri : sopublishers@gmail.com cyangwa ukaduhamagara kuri : Tel: +250783203433,, +250783399900
