Leta Zunze Ubumwe za Amerika zigiye koherereza u Rwanda doze 488.370 z’inkingo za CORONAVIRUS zo mu bwoko bwa Pfizer.
Bloomberg yatangaje ko izi nkingo zizoherezwa muri iki cyumweru binyujijwe muri gahunda ya COVAX igamije kugoboka ibihugu bikennye mu rugamba rwo gukingira COVID-19 kuko byagaragaye ko byakomeje kugorwa no kubona inkingo.
Muri izo nkingo harimo 188.370 zabazwe mu zigera kuri miliyoni 500 icyo gihugu giheruka kwiyemeza kuzatanga ubwo habaga inama y’ibihugu 7 bikize ku Isi (G7) yabereye mu Bwongereza muri Kamena 2021. Izindi ibihumbi 300 ziri muri gahunda yihaye y’iki gihugu yo gukomeza gufasha ibihugu bikennye.
U Rwanda ruri kugerageza kwihutisha ikingira rya COVID-19, aho ubu rumaze gukingira abaturage 8,5%, muri bo 5,4% bahawe dose imwe naho 3,1% bahabwa ebyiri.
Minisiteri y’Ubuzima iherutse gutangaza ko hafi 50% by’abatuye mu Mujyi wa Kigali bamaze guhabwa urukingo rwa COVID-19.
Barimo abamotari, abashinzwe umutekano, abanyamakuru n’abandi bafite ibyago byinshi byo kwandura cyangwa bakazahazwa n’icyorezo, n’abarengeje imyaka 40 bashyizwe mubari ku ikubitiro bagomba gukingirwa .
Umuyobozi w’Ikigo cy’Igihugu gishinzwe Ubuzima, RBC, Dr Nsanzimana Sabin, yatangaje ko hari icyizere cy’uko inkingo zikomeje kuboneka ku bwinshi mu ntangiriro za 2022 abantu bazaba basubiye mu buzima busanzwe.
Yagize ati:”Nkurikije umuvuduko biriho, nkurikije inkingo ziri kwinjira, nkurikije ko nko mu Mujyi wa Kigali abantu barengeje imyaka 40 hafi ya bose bamaze kubona urukingo; ejo bundi nitubona nyinshi no mu ntara turabigira dutyo. […] Mbona ko tuzatangira umwaka wa 2022 abantu benshi bakingiye. N’iyo haba hari bake bagifite ingingimira, dufite benshi bakingiye, ntibyabuza ubuzima gufunguka.”
Raporo ya Minisiteri y’Ubuzima yo ku wa 16 .08. 2021 yerekana ko mu Rwanda hamaze gukingirwa 898.754. Ngayo nguko!!
Ibyari imbonekarimwe, bigiye kuboneka ku bwinshi.
