Muri Leta Zunze Ubumwe za Amerika umuryango wa Paul Rusesabagina ufungiwe mu Rwanda kubera ibyaha by’iterabwoba yahamijwe, watangaje ko wakiriwe ku ngoro ya peresidanse y’Amerika ‘The White House’.
Kanimba Carine umukobwa wa Rusesabagina kuw 3 Gicurasi 2022 yashyize kuri Twitter amafoto atatu amugaragaza ari kumwe na Anaïse Rusesabagina hamwe n’umubyeyi wabo, Tatiana Rusesabagina hamwe n’umunyamategeko Ryan Fayhee bose baba muri USA, bari imbere ya White House.
Kanimba kurukuta rwa Twitter yashyizeho ubutumwa bugira buti: “Mwakoze kutwakira kuri White House uyu munsi kugira ngo dukorere ubuvugizi Papa, Paul Rusesabagina, akurwe mu gifungo kidakwiye mu Rwanda.” Gusa ntabwo Carine, uwo mu muryango we cyangwa uwo ari we wese wifatanyije na bo mu bukangurambaga busabira Rusesabagina gufungurwa, batangaje cyangwa ngo bagaragaze uwabakiriye kuri ibi biro.
Ibije nyuma yuko batangaje ko bagiye kugeza mu rukiko rwo muri USA bamwe mu bayobozi bakomeye mu Rwanda bashinja kugira uruhare mu cyo bita ishimutwa rya Rusesabagina, Leta yo ivuga ko ritabayeho. Iki kirego gifite agaciro ka miliyoni 400 z’amadolari.
